O nama   
Kontakt   
Oglašavanje   
Impresum   
Uvjeti korištenja   
Pošaljite nam vijest!
GlasLike.hr
Lika nekretnine
povratak

Dobro jutro, Rvacko!

1/5
Dobro jutro, Rvacko!
Dobro jutro, Rvacko!Dobro jutro, Rvacko!Dobro jutro, Rvacko!Dobro jutro, Rvacko!Dobro jutro, Rvacko!
Objavljeno: 28-01-2017

OTOČAC – Pa napalo sa svi stran – rekla bi teta Ružica, legenda u Folkrolnon društvu Otočac, kudaj se treba rano dignut Bog te stvoril, man iza tri ure (rekla una da ni' ni spala, da je zerkicu na sećiji prokunjala), tudaj uvatila i nemila čvika. Ali kase gre na televizuju, e tote ni' unda nikve muke. Red se bilo spremit, zet prte sobon, ma ne samo čaš obuć, već su se tote nosile coklje, preslica, vuna, čerape, a ila – da se i ne pita. Osobito jelito.

Unda jopet kad dojdeš na tu vratarnju televiziju, ni to samo bub u študijo i snima se, ma kakov! Red je imat takozvane tonske prove. A ča je to nek vrag pogodi. Morda da 'ni na televiziji vididu znadu li naši pivat i igrat. Znadu, kako ne znadu, pa poč bi i' pozvalo ako ne znadu, borati? Ta ne bi se njeva voditeljica Verica špotala samo tako, el. I unda dok su se tako isprovali, kreni – stani, ponovi – pa jopet, unda se red bilo svuć sve do gać i cicnjaka pa robu na se vrć, nakinčat se. Al ni' to sve, unda je red bilo svimi u šminkeraj. – O sveti vratar ne će – jadala se teta Ružica – ča mene još pod stare dane ne će snać?

Pa kasu i' lipo našminkali unda u študijo. Teta Ružica se čudila količak je taj študijo: - Ode li moglo stat puno bal sena, borami bi – ocenjivala je študijo i zvirnjala i tako se potrkla na nekvu škalinu, dobro ni' glavi mesto našla. A vi ča peljedu Dobro jutro Rvacka, uni mislili kako će i' trma poist, ma kakov! Teta Ružica (kaj Ružica Trauber, starji se sićadu ki je una) konda je na televiziji penziju dočekala, nema ta trme ni koliko bi pod nokat stalo. Samo ča joj je emisija kratka – imala bi una celo jutro, ma sve do podne divanit i pokaževat: – Unda debeli drob prefrknete, najbolji je gužnjak, da prostite, i nadivate jelito, kukurznova brašna, dvi-tri šake žmar, krvi – divanila je kako se nadiva gačansko jelito. Pa ča sa slaninon, kobasicami, ča je mrs. A to jopet nima ča peljedu problem, treba skratit, a čaš skratit kad je sve dobro. Nekako su izorali i sve kraju pripeljali. Televizija preživila.

Drugo ste jutroske vidili na televizoru. Ako niste, a ki van je kriv? Poite se!

M. Kranjčević

Foto: V. D.

Podijeli novost na društvenim mrežama!