OTOČAC – Ni lako umrit, ni. Ma kakov lako! Ta ne veli se badave za nekoga ki umire da mu je duša u nosu? Veli. Ali, kase kaže da 'Umri ženski!', e tote već i vrag ima svoga posla. Ča ni smrt – smrt? Bilo muška, bilo ženska. Vanda se ode dela o ženskima i nekvoj 'maloj smrti', kako su to u Francuskoj nazvali, Bože nan prosti, ne smimo dalje to opiševat, ipak je vaj portal ozbiljan.
A kadi se to 'Umire ženski'? Pa u Gackomu pučkomu otvorenomu učilišću, nego kadi bi drugdi? Tamo reklo da će se 'umirat ženski' voga dojdućega utorka, u osam uri svečera.
Ni ni skupo, samo dvajst kun za umiranje. Pa kad neki još kaže da danaske ni jeftino ni umrit.
Kako se 'umire ženski' pokazaće nan Amatersko kazališće Arupijun iz Otočca. Nji desetak će umirat i pripomagat da se umre, el. Toliko je glumic i glumcov napeljano na spisku.
I sadaj, ma ki to ne bi došal vidit? Samo naj ki ne drži do sebe i do svoje kulture (a namo se oćemo kako smo svi pametni i kulturni). Vdićemo u utorak koliko esmo, nu.
M. K.