O nama   
Kontakt   
Oglašavanje   
Impresum   
Uvjeti korištenja   
Pošaljite nam vijest!
GlasLike.hr
Lika nekretnine
povratak

Ki to sve snigon uznemiruje javnost?

1/1
Ki to sve snigon uznemiruje javnost?
Ki to sve snigon uznemiruje javnost?
Objavljeno: 29-12-2014

KOMPOLJE – Zabelilo, rekal bi stari narod. A to znači da je osnižilo. To jopet znači da je pal snig. A kako i ne će kad je sred zime. Ljudi se čudidu ča je pal snig, kaće ako sadaj ne će? Konda pal u srpnju, slobodi nas Ime Isusovo.

Neki se snigu kaj radujedu, a borme neki i ne. Svi nešto pripovidadu kako dici treba snig, kako je to lipo da ga za Božić bude, a kad uvati čvika, a samo ča ni' uvatila, undajdu mrmljat kako je ledeno „da za nokte zalazi“, kako je „ledeno kaj pas“ (zač baš pas, nismo mogli se dovrć tomu) i svi čekadu da otepli i da proliće dojde. Tote treba prtine gradit, tote ti ralica nagrnja sniga s ceste da i kranp ima posla, ki ima kolan mora traktor palit i ralicon prtinu napravit, a traktor ne će da pali, oladil se, akumulator kašlje. A drv, drv da i' u šajtrogami voziš ne moreš i' nadat. Loži oganj i u kući prcofulji, î i debeli se.

A unda jopet kad na našin televizijami čuješ kakovo će nas zlo spopast s tin snigon, dojde čoviku da se poništi prije nego ta nesrića dojde, jerbo će past „pol metera sniga“. Amerikanizacija se uvukla pod kožu svudaj, od svačesa se dela pripovitka i jadni narod plaši, konda mu ni' dost svega drugoga.

Pitali smo našu babu Francu ča una o tomu misli, a una nami ni pet ni šest pa veli vako: - Kako to da se nekomu man napiše prijava i eto te kod suca za prekršaje za širenje lažni vjesti i za uznemiravanje javnosti, a kad vi s televizora to deladu, kad uni širidu lažne vjesti i uznemirujedu narod – unda nikomu niš? Da ja rečen da eto sniga od pol metera, ja bi man, sve vako stara, dospila u Lepoglavu. A, reci ti meni?

I doista na vo pitanje ni' joj lako bilo odgovorit. Očito da zakon ni' ednak za svakoga, za nekoga vredi, za nekoga ne vredi, a mi uz gusle pivamo o „pravnoj državi“.

Dalo bi se još toga reć, al još uvik su sveti dani pa bolje ča i pregrist (ne mislimo na ranu).

M. Kranjčević

Foto: A. Kaćunko

Podijeli novost na društvenim mrežama!
Novalja.coom