ŠVICA – Eto Ivanje, eto berme. Treba se pripravit, ta kako bi to drugovačije, eli. 'Ni ki imadu bermanike, 'ni se moradu kod kuće pripravit, ni' to kaj negda, Bog te stvoril. Doće narod, treba kuću prokresat, ča uredit, da ne dojdeš peračami na jezik, treba kuću nakinčat, pokazat se, van da kako. A kako kod kuće treba prokresat, borme tako treba i crikvu i okolo crikve prokresat.
Oko crikve, ma Bože slobodi, trava i šapračje naraslo konda iz vode raste, konda se ve godine ni' kosilo, a je. Ajme pelde, more biškup, kad dojde na bermu, zabasat pa se izgubit u travi, neš ga nać, imaće cela Švica posla, morda i gorska služba za spašavanje. Borami oće.
Da se to ne bi dogodilo, tote je Udruga Švički slap. A ki drugi van uni, sazovedu se, dal Bog mobitele, i eto i' škaplulat crikvu sv. Ivana od trave i šapračja. Ni' to lako, ni', ima tote ivragu, Bože nan prosti i ne zamiri, posla. I kosilice, i obične kose, i trimeri, i motika i srp, nikako tomu doć kraju.
I tako dok edni kosidu i rvedu se s travušćinom, dotljen se ženske uvatile vrtlacov oko crikve, okapljedu rožice i sadidu nove. Ojdu se pokazt pred sviton, da kako. Ima i 'ni ki veselo gljedadu ča se dogaja, prston upiredu i velidu „to treba vako, uno treba nako… „, već kako to gre med narodon, eli.
A unda kod švičkoga popa Mile ima nekvi matrakov, nekve gnjile graje se najde od prije sto godin. Ča ti vredi pokosit ako to drlo nisi makal, kaj ruglo da je. Red traktor upalit i odvest kadi u kakovu jametinu, e. Unda je red sve lipo pograbit i uredit da bude „kaj park“. Eto, ni baš kaj park, al Bože moj, koliko se dalo. Jerbo je puno zupcov na grabljami otpalo, ma i grabljišćov je bilo prebijeni, i vile su imale posla da se to reši. Al rešilo se.
Moralo se to prije učinit, ne čekat zadnju uru, nema se vrimena. Svaki ima svoga posla, kod kuće i oko kuće. Ni' samo to, Udruga Švički slap ima posla i oko ivanjskoga ognja koga smira palit svečera Ivanje. Treba s tin poštentat, drv dovest, poslagat i sve priredit da se užge oganj, kaj u Švici ni' svitlil još tamo od 1942. godine, velidu. Bila vučljiva vrimena u ratu, a iza rata ma ki je smil od komunistov i antifašistov i pomislit da bi oganj za svetoga Ivana palil, niki. Bi te man prijavilo i eto ti zla. Mogal si i u pržunu završit. Eto, došlo vrime da se i ta tradicija vrne, da Švica da nešto svoje, jerbo svima je poznato da se ognji palidu svečera Jurjeve, al za svetoga Ivana to je bilo u Švici i nigdi više, baren ča se tiče Gacke, el.
M. Kranjčević
PRINT
