KONPOLJE – E jutra je taj dan, jutra je proslava letnje Stipanje u Konpolju 'po staromu kalendaru'. Ča bi babe rekle, 'pok je svita i vika' Stipanja je bila na 20. kolovoza, a unda je pred puno godin popi premetnušu man iza Velike Gospe. I kako su to napravili, tako je nekako i Stipanja jenjala, preblizu je Gospi, ča je je. Mora se vrć i ruka na srce pa reć da je malo naroda, da to ni kaj negda kada nisi mogal oko konpoljske crikve prošećat koliko je naroda bilo. A čaš, kaj svagdi u voj našoj Rvackoj, el.
E, al juta ne će to bit samo tako, mašica i gotovo. Dolazi biškup! A berma ni. Dolazi biškup Križić po prvi put u Konpolje, a kako i ne će kasu un, el biškup, i don Angjelo kaj prst i nokat, poznedu se ima već stotina godin. Ča bi rekal don Angjelo 'poznen ga u stari opanci'. Ma siguro i un njega, el Kaćunka.
Pivana maša biće u 11 uri. Uz biškupa Križića biće i sva sila popov, ma kako i ne će kad in je dan fraj, ni nedilja pa nemadu svoje maše. Mudro je to don Angjelo smislil, mudro. A mašu će 'providit' (sase tomu tako veli za pivanje pod mašon) konpoljski župni zbor (sinoćke se pokazal kasu zbori iz Otočkoga dekanata rozgali, borami esu). A da bi bilo sve kako spada, njimi će dirigirat prof. Renata Krajina iz Zabrega.
A unda kašnje maše, unda je pučko veselje oko crikve (za ne ki nisu pozvani u kvartir i za ne ki ne stanedu u kvartir). Biće ića, biće pića, lovci kuvadu lovački kotal za verni (i naj drugi) narod. Kase još k tomu dometne dajdu svirit i pivat Plitvički bećari, uuuuu, pamtit će se konpoljksi zbor il po lipomu il po ružnomu. Borami oće.
M. Kranjčević
PRINT
