O nama   
Kontakt   
Oglašavanje   
Impresum   
Uvjeti korištenja   
Pošaljite nam vijest!
GlasLike.hr
Lika nekretnine
povratak

35 godin ... puno je to, tekar kad je u pitanju KUU Gacka iz Lešća

1/1
35 godin ... puno je to, tekar kad je u pitanju KUU Gacka iz Lešća
35 godin ... puno je to, tekar kad je u pitanju KUU Gacka iz Lešća
Objavljeno: 27-06-2015

LEŠĆE – To sve živo ligon večeraske gre u Lešće. Bog zna oće li taj sav narod imat i kadi stat, je da je iza škole dost mesta, al jopet, jopet. I 'ni ki su šli na more, braćedu se ranije kući i drito u Lešće. I mlado i staro, i zdravo i bolesno, ma svi. Edni se mamidu na slavljenika, na KUU Gacka iz Lešća, drugi na Kiću Slabinca, kako ki.

A ča je na stvari kad je tolika jagma? Pa Kulturno umetnička udruga Gacka iz Lešća slavi godišnjicu, i to ne bilo kakovu, van trispetu. Lipa je to godišnjica, to je i u ljuckomu životu lipo vrime, a kamoli u ednoj udrugi, e.

Da će se imat ča vidit – imaće se, da će se imat ča čut – čuće se. A kako i ne će. Tote će nastupat HKUD Perušić, pa KUD Sv. Mihovil iz Galovca, pa KUD Brinje, pa Ženska klapa Senjkinje i na kraju Kićo, Bog te stvoril. Al da ne zaboravimo, a to se more lako trefit, KUU Gacka se i te kako pripravila za 'vu godišnjicu. Nejdu uni samo pivat 've domaće pisme i igrat domaća kola, ma kakov, presvlačijdu se više puti, igraćedu i pivat šlavonske kola i pisme, pa dalmatinske, ma ki sve more nabroit čajdu pokazat. Da nikoga drugoga ni', već bi ovo bilo dost da se dojede i oči napase, el de.

A sve van to, moj narode, počimlje u  sedam uri svečera. A koliko će trajat, ijh, ki to more predvidit, spominjat polnoći je malo, dokljen ki izdura, el.

I još uno najglavnije, niš se ne plaća, badave. A morda se ča i kroz grlo užije. Morda se komu posrići pa užije i ča drugovačije, el, škurina je škurina. Sve je dopušćano, dakako.

M.K.

Podijeli novost na društvenim mrežama!
Novalja.coom