ŠVICA – Oće doć – ne će doć, oće doć – ne će doć … moglo se 'vi dani čut svakakovi pripovitkov o Šimi Strikomanu i milenijskoj sliki u Švici. Naš narod je takov, el, ne veruje un ni sam sebi da bi komu drugomu. Pa mu lakše na duši poverovat da taj čovik ne će doć, nego da će doć. Mogal si grlo rasparat tumačit da je sve dogovoreno i da čovik dolazi, badave.
Unda jopet se pronesal glas da to slikanje košta Bože slobodi koliko, mogal si promuknut tumačit da to ni' tako, da takove pripovitke širidu 'ni ki nemadu drugoga posla, ma jopet badave. Nego delaj i muči. A delale su i mučale direktorica TZ Otošca Mladenka Orišković i precednica Udruge Švički slap Ivana Prpić.
E sad, Šime je došal, još čera je iz Kostajnice došal, tamo je za svetoga Antu njimi slikal milenijsku sliku. Svečera je čovik bil u gradu, da otpočine od vrućine i puta, al se jutroske rano digal i od osam uri crtal ribu na ledini. Jerbo ima puno naroda ki veli da bi i un, el taj narod, mogal poslikat tu milenijsku sliku, vatrogasci te dignedu gori nebu pod oblake, pa ako ti se od višljine ne svisti, slikaš. Eeeee, konda je to samo tako! A ki će doli narisat tu ribetinu u ku narod treba stat i unda se poslikat? Zato je Šime sa svojon gospon od jutroske na ledini, trebala mu je pomoć još nekoliko švički dičakov, da japnon, čin li, rišedu ribu po travi. Sadaj kad je riba narisana, treba narod vrć unutra, sve po boji i redu, a narod kaj narod, vajk se muva, ne sluša baš, al ni' ovo Šimi prva milenijska, uuuuu, ima un nji na stotine i stotine po celoj Rvackoj i po Ercegovini snimljene.
A kako bi to bilo da mediji ne pratidu sve ča se dogaja na 1. Ivanjskin danima u Švici? Man mu je red bilo dat izjavu za Rvacki radio Otočac, man je tote slikanje, a tako i treba bit.
Zato, narode, ni' još kasno poć na Gornje švičko jezero i poslikat se na milenijskoj sliki, sad i Bog zna više kad.
M. Kranjčević
PRINT
